الشعر لي

والـله لعز النفــس واحفظ مقـامي

في نايــفٍ دونه مـدى كل مقـــدار

واعلي اسمي فـوق كل الأســامي

حتى تصـدَر بـه عـناوين الأخبار

أنـــا ولــد شيــخٍ عزيـــزٍ عصامي

حــــرٍ كــريمٍ صــارمٍ نـــادرٍ نــــار

الي يفــك المشــكلات الجســــامي

الي شـموخه يتبعه ويـن ماســـار

هــذاك أبو محــمد كعــام الكـعامي

الي برايــــه يهــــتدي كـل محـتار

يــاما سـهر والنــاس كانوا نيـامي

و يـاما تحـدَى لاجلنا كل الاخطـار

هو عـزوتي هو قدوتي هو إمامي

أقولها معـــتز و اقــولها اكــبــــار

والي فرض لاهل الصـلاة الصيامي

والي تَنَزل رحـــمته وقـت الاسحار

ماجالســوه إلا الرجـــال الكـــرامي

الــمـتقين المـســتقيمين الاخــــيـار

وان قابلوه اهـل الحسـد واللئامي

تكشـــفوا لـــو مـثلوا كــل الادوار

وانا عـــريبٍ بالنســـب وبعــمامي

الي لهم بين العـرب كـار و كبـار

واليـــوم أبوفي بالوعـد والــتزامي

يوم التحدي زود اصراري اصرار

الشعر لو هو في هجير و مظامي

صحرا يباسٍ واعتلى جـوَه اغـبار

يجيه من وبــل المــزون الركامي

سحابتي غطَت على كل الامصـار

والمنتظـــر للمنتظــر مــا يـــلامي

لـ قال أنت الغيث واشعارك أمطار

هــذا وانــا ماقلل مــن احــــترامي

لاهل الفكر واللي يقولون الاشعار

لكـن وقــوفي يحـتمي بــه كـلامي

والشعر لي . والي يقولونه اكثار

ســـاعة تــأمل

لولا غلاك الي كسر حاجز الصمت

ما كنت أشـــوفك كل ســــاعة تأمل

واســامرك كني معــــك ماتوهــمت

واضم طــيفك لـيــن أحــــس بتنمل

أقــول أحــــــبك بس مهمــا تكلمت

ما القى مـن التعـــــبير كلمة تجمل

ولـولا فــــراقك كان ما قــد تألمت

ولا حـزنت ومحجر العــين همــل

ودي أشـــوفك حلم. واحلم إذا قمت

ألقــــاك والا ارجـــع أنــــام وأكمل

أنتي دوى الأحزان والضيق والكمت

وانتي الأمـــل إن كنت بالــناس أأمل

يا نـــور عيني في غـــــيابك تعلمت

معنى الفـــراق إن قــيل مــا ينتحمل

شوفي غلاك اليا اظلم الليل واعتمت

ونـــاح الخـــــيال بنــوح بنتِ ترمـل

قصيدتي عذرا تجي تكســر الصمت

صاحت وانا في صمت. ساعة تأمل

قدامك العز

زيـــــاد قـل لـي حـبيب الـروح وشـــلونك

غــيابك أصــعـب على قلبي مـن غـيـــابي

ودي بشـوفك وانا ادري وش تبي عيونك

يا الـي معــي دوم مــثل الظل و ثيابــــي

دونك من الشوق جســرٍ بس مــن دونـــك

بابٍ عجــــزت افــــتح أقفـــاله وهـو بابي

حسبي على الحظ يا حـسـبي على غـبونك

لـ اجـبرك صـبرك تحـرى ابـوك لاغابي

زيــــاد يفــــداك عمــــري لا يهمــــونك

عـينـي عـليك ومطــاليبك على حســـابي

تكــبر وتبقى بـ ابـوك ظـنــونك ظـــونك

واحلامـك البـيض ترقى بك وترقـى بـي

أنــا أكـثر الـناس رجـوى يـوم يرجــونك

وانت أول القـــوم في عيني وفـي كــتابي

ســميتك زيـــــاد أخايل ناشي مزونــــك

واخترت أمك من اعـرق طيب الانسـابي

ولّا عــمامك فـــوالله مــــا على كونـــك

أحسـب ولا انسب ولا أعلى منهم القـابي

قــــدامــك العــــز لا تســـتعجل متونــك

ينبــت لها الــريش لامن شـافت أسـرابي

إن قــــاله الله عســاك بحـفظـه يصـونـــك

لو عشت عمري على شانك على اعصابي

لتصيد الاســـراب.. والعقــــبان ينصونك

وتعــاود الطلع مـــن مشــراف مرقـــابي

عسى ايامك فرح

ذكـــرت الله وفضـل الله علينا

كـبيرٍ يــوم ســـلمك وحــماك

إلامـــنك تعــــبتي مـــاســلينا

أشوف بوجـه كل ناسك غلاك

جـــدانـا نطلب الله والتجـــينا

بوجهـه لـــين عافاك وشـفاك

وانا لو كـان أمـرك في يدينا

فــديتك كـل مــانملك فــداك

‏

عزيزه يااختي الي من وعينا

على الدنيا تزايـد بك وفـــاك

عـســـانا يـاام عبـدالله وفـــينا

معك لاخــيب المـولى رجاك

عسى أيامك فرح في كل حينا

عسى الأحزان مدفـونه وراك

يجيب الله بعــد العســـر لينــا

يـبدل كل حـزنٍ فـي رضـاك

بطـول العمــر مع ماقـد بنينـا

من التقــديـر مـا يفنى معــاك

مملكة حبي

 ياقصيدي لا يخــيب الظـــن فيــــك

 ولا تلحقني على الشـــرهه مــــلام

 أطـلق عــنان المشـــــاعـر تقتفـيك

 بالفــــرايد خــــيل مــوزون الكــلام

 الطــروق طــروقـك الي ماتعصــيك

  كل طــرقٍ ٍ لك على صـدره وسـام 

 والحبيبه يــوم ترســـل تحـــــتريك

 تنتظــر ردك ولا تقـــــــدر تنــــــام

 هــذي الي ما دخـل معـها شـــريك

 ولايســـاويها أحــد بيـن الأنــــــام

 قـل لها كـــم ولـعـت قلـبي وابـــيك

 تنقل الصـــوره مــثل ماهي تمـــام

 مملكــــة حبــي تـرى حــبك ملــيك

 يابعـــد كل الغـــــلا وبعـد الهـيـــام

  أعشــقك واحب أرضك وافـــــتديك

 واحفظك بـــالقلب واعطـــيك التزام

 يــامــلاكٍ بس أقـــول الله عليــــــك

 لاذكـــرت أيـــــامنا فــــــي كل عام

 شــاعرك مالحظةٍ مــــرت نســـيك

 لـو هـــمومه بالســــما مثل الغمام

 غالـيه كـــثر الوفـــا الي محــتويك

 كثر مـاانتي فــارقه وســط الزحام

 كـــــثر ماهـــم النســــا لــو تبتليك

 كــثر ما تعني الرجــــوله للكـــرام

 كم يغيب من البشــــر عني واجيك

 واشعر إن الناس في خـير و سلام

 وكم إذا غبتي حضــور الناس ذيك

 ما تقـــــــول إلا تشـــمت بانهـــزام

 مــن عـــرفتك وجهتي منــك إلــيك

 بالمحــبه والـــوفا والإحـــــــــترام

كلمة هلا

كلمة هـلا طبعي وهي شي عـــادي

أما أنت لا ما اقول لك ياهـلا فيـــك

لا تعتذر لاعـاد باسمي تنــــــــادي

وانا تراني بعـد ها اليوم ناســــيك

وان كنت معـطيك الغلا بليل هادي

يخفي ظــلامه واقعك بان خافيــــك

ياالي بــدون أسباب تجحــد ودادي

وتخون ميــثاق الولا مـع مواليــك

تخطي . و مـادام الخطا في تمـادي

أببتعد وانت الـليالي تربيـــــــــــك

نفسي عـزيزه يمكم لو تقـــــــادي

تصد .. مانيب لعـبةٍ بين أياديـــــك

بالصبر حتى الصـد وهو صعب عادي

ومادام عادي . عـادي إني أجافيــــك

صمت القصايد

مدها يمـــناك يـا صمتٍ فقــد له فكر شاعــــر

مَلْ من وقته و صم اذنه صدى صوت الدقايق

لا يقــيدك الــزمـان ولا تحيط بك الـــدواير

عــانق يـــدينٍ مــداها مــن ورا كل العــوايق

عــيش حــرٍ نــرجـسيٍ حـقق أحلام النواظـر

في خــــيالٍ ما يردك للفـــــتات و للـــــبوايق

لك علي أعطــيك هيبة شــيخٍ اعتاد المـنــابر

حفّـــته كل القــــلوب وتتبـعــه كل الخلايــق

واتخير لك مـن الخــيل السبوقه وانت خابــر

في ملز الخـــيل فرق الاولات من العلايـــق

كان مانسّيك روتين التشــــــــابه فالمـــناظر

وارتقي بك للحضـور الي على طاريك لايق

لين يشهد لك زمانك ماعليك اليـــوم قاصـــر

صرت في مدك كريم وصار جزرك للحايق

لاترجى غير صمتك لو تصيح بك الحناجر

ملت الأذواق ترديد المشـاهد والطرايـــــق

ياكـثر ما مر بارضك عاني و مرات عابــر

وانت عن لجة بحورك بـين أسوار الحدايق

إيه ياصمت القصايد جيت لك من أجل خاطر

من قـرن اسمي بإسمك لين خلانا رفايــــــق

مدها يمــناك ماني عن طروق الشعر ذاخر

قــافٍ يشــيلك ويبحـر بك ولا يترك ضـايق

مدها يـمناك ياصمتٍ يــدور فكــر شــاعر

مَلْ من وقته يراقب .. كيف تمشي هالدقايق

اشتقت لك

إن طـــالت الفــرقا و تناسيت ياصاح

ذاك الزمـــــان الي مضى والسنيني

مااظـــن تنســاني وانا كيف ابرتاح

يـا كـم ذكـرتك ثم جــــــاني حـنيني

مــرت بــنا الأيـام باحــزان بافراح

مــرت بــنا وكانت يــــديك بيديني

مــاكــن ذاك الوقــت لاجا ولا راح

مــا كنـي ذراعــك وكـــنك يمــيني

لـ اســـودت الدنــيا فانا نجم وضـاح

تمشـــي بدربك في ثبـات ويــــقيني

وان طـــال ليلي كنك الصبح لا لاح

تشــرق بنـور مـد لي نـــور عـيني

والــيوم يـوم البعـد زود بي جـراح

وشفت القـدر كم حط بيــنك وبـيني

اشتقت لك وان كان حظي بكم طاح

الله علـى بــلوى فــــراقك يعـــيني

فصل الخطاب

ياغالـيه هذي اطيافك على كل بـاب         

هـذي مواريك فـي قـلبي وسـط بيتها

مشتاق اشوفك على الله مايطول الغياب          

يـاالـي عـلى كـل خــــلق الله بـديــتهــا

ياملهمتي سـبيل الـمعرفـه والـصواب          

يا نــور كـل الـدروب إلـيـن عـديـتهـا

يا بـلسـمٍ للجـروح وللـعـنـا والـعذاب        

يا قـلبْ يـنبض هلا بك كـلمـا جيتهــا

يا منبع الطيب ياالي ما تعرف العتاب        

وانا مـقصر واشـوف حقـوق ما اديتها

يا قـبلـة الـطهر ياصبـحٍ تـنفس وجـاب        

أعـذب نـسـيـمٍ مـن الـجنـه وشـمـيـتـهـا

يا شجرة أصلهـا يـغوص بـانقى تراب        

يا بـنت نـاسٍ تـفاخر حرب في صيتها

ياصرح شامخ لو اكتـب كل يـومٍ كـتاب       

واقـول فـيـها الـقصيد العذب ما اوفيتهـا

هذا انـتي يمه طيـوفك في ذهاب وإيـاب       

وهـذي مشـاعـر عـزيزه يـوم غـنـيتـهـا

وانـا لو ان الـبلاوي غـربلـتـني وشـاب       

قـلبي والاقـدار تـعـصـف بي مواقـيـتهـا

يـوم الـليالـي تـجـيـني كل يـوم بـمـصاب      

وأقـول أنا بخير وعنك همومي اخفيتـــها

لكن غـيابـي ورب البيت ماهـو انسحاب      

ولا تـجـدّي يـدي مـا يـوم مـديـتـهـــــــــا

مـن طحت يمه وانا الي ما يخاف ويهاب        

وانـا الـمطـالب علـى مـا ابيـه ظـريـتـهــا

ما كني الـذيب يـوم اسمع قـنـيب الـذياب       

ومـا كـن لي عزوةٍ فـي نـاس  خـاويـتها

يـا كـم لـيـلٍ غــدا بـي مـطـمعٍ للـــدواب        

حتـى الـسـحـالـي تـهـقـوى بـي و عنيتها

لاعاد لي قـدره اتـحرك ولا اعطي جواب     

والـنفـس فـي حـاجـتـي للـخـلـق ذلـيـتهـــا

لولاي مسـلـم واخـاف الله شـديـد الـعـقــاب     

مـا كان حتـى الـفروض الخـمـس صليتهـا

إليـن خـفـت الـمـهونه وانـحنـاي الـرقــاب     

وطـعـون ظـهـري تـخـيـر فـي تـوابـيـتـها

وعرفت معنى انكساري يوم هاالحيل ذاب      

تـقـول مـعدود بـيـن الـنـاس في مـيـتـهـا

ما كـنت اببعـد ولا يـطري عـلي الغيـاب      

لـكن عـلى شان أعـز الـنـفـس سـريـتـها

أسري ركابي عـزومي والـتصبر زهاب      

عـديـلـه آلام مـدري كـيـف سـاويـتـهــــا

في سـرمدي ظـلامه أسـود من الـغـراب      

يـا مصعب الـدرب والـي فيــه لاقـيـتـهـا

واصبح وحبل الرجـا بـعـيـد دونه سـراب      

مـا قـربـنـه خـطـاوي رجــلٍ احـفـيـتـهـــا

إلـين مرت سـنه عـن كـل عـمـر الـشـبـاب      

وانــا صويــبٍ ونـفـسـي فـي تـنـاهـيـتـهــا

أعـانـي جـروح مـا تـبـرى مـن الالـتهـاب      

واعـلـل الـنـفـس بـوعـودي ومَـنـّـيـتـهــــا

مـا كـنـت انـا الا هـذاك الـي يـعـز الـجـناب      

الـي إذا راح مـا يـرجـع بـيـالـيـتــهـــــــــا

الـي يـخـافـون ربـعـه فـقـدتـه يـوم غــــــاب      

الــي بـكـل لـيـلـةٍ ظـلـمـا وهــــــــو لـيـتـهــا

مـا اقـول راجـع بـشـلـفـا مـثـل شـلـفـا ذيـاب       

ولا ادعــي انـي حـروب الـزيـر أحـيـيـتـهـا

أقول راجـع واذا تـبغـيـن فـصل الخـطاب       

فالله  حـســـيـب الـنـوايـا كـان مـا ابديتـها

لـ جـيت يُـمّه عرفـتي وش ورا هالغـياب      

لا شـــفتي جـروح قـلـبي كـيـف داويـتـهـا

بنت أبوها

أنتيِ يـــــا بنت أبـوهـــا كلمـا تطلبيــــــن 

لا طـلبتـي تحــــــوّل مطــــــلبـك مطـلبي

فـــدوة عـــيون ريــــما كل شـيٍ ثميــــن 

من يعد الخســاير ما حســــب مكســــبي

يا حلـو هالكـــــــلام الـــي يعــيـي يبيـــن 

غير لامـك تتـرجـم لــي وش الــي تبــي

العــــبي لـــو تبــيـن بلعــبـك تخربيـــــن 

يـا مــلاك الـطفــــوله خــــربي خــــربي

لك بقلـــبي مكــانك مـــــثل مـا تعرفيــن 

لو صغر عمرك أخفى عنك وش مذهبي

والله إنــي هــذاك اليــوم يومــك تجـيـــن 

لـهـفـتـي لـك تـوقـد لـيــــن زاد لـهـبــــي

يــوم شـــفتـك و كنّـك وردة الياســميـــن 

بـس عطـر الـطفـولـه فيه مسـك الظبـــي

طلتـك طلـة البـــدر بسفــــــر تـايهيـــــن 

أو شـروقٍ بعـJد بـرد ورمـاد احـطـبــي

واذكــــرك في عنـــادك قبل لا تجلسـين 

يـوم أشـيـلـك غــلا قـلـبـي عـلى منكبــي

وانتمشــى واغــني لك وجـــوّك يزيـــن 

مـا نـسيـت أي لحـظه ما نسيت الحبـــي

نـــاذرٍ بـاقي العمـر إن بقـــت به سنيـن 

لاارخـص الـعمر وايــامــه وكل تـعـبــي

لجـــل لامـــن بغـــيتي شي في كل حين 

كل شــيٍ يـلـبي لــك هـــلا وارحــبــــي

لين اشـــوفـك مناره للسّمـــــو المكـيـــن 

ما انـحنـى طـرفـك إلا لاتبـــاع الـنـبــي

أنتي يا بنت أبوها بنت عزٍ و ديـــــــــن 

بنتـي الي تـمـون . وتاخـــــذ الي تـبــي

طيفك ينادينى

 يمــه تـرى هالبـال شــوقه لعب فيـه

 طـاريك حـله والقصــيد ارتحـــالــه

 مــافيـه شــيٍ يـا الحـبيبـه يســـليــــه

 إلا خـــيالك يــوم جــيتي قـــــبالــــه

 يذكرك قلبٍ طــاري اسمك ينسيــــه

 هـم الغــــياب وهـم فـــرقى عيالـــه

 وعينٍ على شــوفة عيـونك تباريـــه

 ترقــب لقـــاك وكل زيـنٍ فـدى لـــه

 لو الوفا لك حق ... ولو قلت أبوفيـه

 ما الحق جزاك ومن يحصل جزا له

 أنتـي مــدد خـــيرٍ عجزنا نجاريـــه

 أنتي وطـن ما عـاد تقصر ظلالــــه

  أنتي نِفَس روحي وعمـري وأمانيــه

 أنتــــي حــياةٍ كل أبـــوها عدالـــــه

 بارضك... ينابيع الرضا دوم ترويه

 ربيعها ســحر القلـــوب وجمالـــــه

 ســماك مـثل النور وليلك يحليـــــه

 إن القمـــر دايـم وهـو فـي كمالــــه

 يمـــه فداك العمر لو أقدر أعطيـــه

 فـــــداك مـن يمـشي بدنيـاه دالـــــه

 فـداك شــعري يوم تبدي معانيــــــه

 شيٍ على الخــاطر طرى له وقالـــه

 أنـا الشـعر لـ اســرجت خيله قوافيــه

 حــوافرٍ تضـرب باثـرها جـزالــــــه

 مبــداي ما للمـدح عـندي مشاريـــــه

 الطيب واجــب والمــواقف مجالــــه

 مـا ينطبع في شـعري إلا من أغليـــه

 الي حشـا مــا فـي وجــودي مثـالــــه

 الي يهــز الفكـــر لا حــل طاريــــــه

 الي معــي دايـــــم على كل حـالـــــه

 طــــيفك ينـــاديني .. وجيته ألبيّــــــه

 مشـــاعـرٍ مــا تطـلب إلا وصـالــــــه

 لنّك بحــر شــعري وهذي موانيـــــــه

 تلاطـمت كل المعــــــاني بجالـــــــــه

حتى رسـت في ساحلك مع رواسيـــــه

 قصيدتي بيــــن المـــــياه ورمالـــــــه

 احــــمولها قــــدرك بـوزنٍ موَفّيـــــــه

 مـــن الغـــلا يمـه وحــــــبك الحالــــه