يا صاحبي قام قاف الشعر يلعب بي
وانا مع ابيــاتك الجــزلات طربـانـي
أقرا بها الشوق يوم ان الهوى هبي
واشوف حزنك و اميز طعنة الجاني
أقـــول دامــه علـى الاعـــذار منكبي
خله يفـارق تــرى ما جـاك قد جاني
ذكرتني فيــه يــوم اهـديت له قلــبي
وشـرّعت له مـن غـلاته كل بيبـاني
اسـكنته القلــب يــامر فـــيه والـبّي
يعــني ملــكني و يعــني لـه تـوَلاني
يومــه تغــير تقــول انه يجــرب بـي
والا الهوى مـاثنى قلـبه على شــاني
أشـقى حــياتي وصــار مفـارقه طـبي
وعـوضني الله بخــير منـه واحـيـاني
و ياصـاحبي صاحبك لـو كان متربي
ما صـرت طـلاب ثـار وشـفتك تعاني
مــــــا كل الارواح لاحـــبيت تنحــبي
ولا كل نفـس تـرد احسـان باحسـاني
كانت هذه القصيدة ردا على قصيدة الشاعر/ بنيدر الحربي
والتي قال فيها :
يقــول غلطـان ! راجــع يا بــعـد قـلبي
راجــع حســابك وحــبك أول و ثـــاني
يمكن ! ويمكن! ويمكن! مير وش ذنبي
وش ذنب قـبي يـــذوب بقـلبٍ أشـقاني
يــا ويـل قلــبه ويـا ويــله على دربـي
مايكفي الشـوك! حـتى ينـثر احـــزاني
أعــيش كلي ألـــم و لحــزني مخـــبي
مــابيه يفــرح ويشـمت في عـــدواني
فــي قلــبي الشــوق والنيران تشـتبي
واضحك واداري بضحكي جرح خلاني
يا صـــــاحبي لاذكـــرته قـلت يــاربي
يــذوق طعـم الهــوى... يجيه ماجاني
ويجــرب الجــرح فـي قلـبه مثل قلـبي
ويــذوق مــاذقت منـه أيــام وازمــاني
والعــب بقــلبه مــثل مــاكان يلعب بي
واعلمـه شــي مـن صــدي وهجــراني
ليست هناك تعليقات:
إرسال تعليق